ഈരാറ്റുപേട്ട മുസ്ലിം ഗേൾസ് ഹയർ സെക്കൻഡറി സ്കൂളിലെ പ്ലസ് വൺ വിദ്യാർത്ഥികളുടെ പ്രവേശനോത്സവം വരവേൽപ്പ് എന്ന പേരിൽ സ്കൂൾ ആഘോഷമാക്കി. സ്കൂൾ മാനേജർ എംകെ അൻസാരി പരിപാടികൾ ഉദ്ഘാടനം ചെയ്തു. പ്രിൻസിപ്പൽ പി പി താഹിറ, ഹെഡ്മിസ്ട്രസ് എം പി ലീന ,വാർഡ് കൗൺസിലർ പി എം അബ്ദുൽ ഖാദർ, പി റ്റി എ പ്രസിഡൻറ് തസ്നീം മുഹമ്മദ്, അധ്യാപിക ഫെലിക്സാമ്മ ചാക്കോ തുടങ്ങിയവർ സംസാരിച്ചു. വിദ്യാർത്ഥികളുടെ കലാപരിപാടികൾ പ്രവേശനോത്സവത്തിന് മാറ്റുകൂട്ടി.
കോട്ടയം ; ഭക്ഷ്യസുരക്ഷാ വകുപ്പ് ജൂൺ 9 മുതൽ 13 വരെ ജില്ലയിൽ ലോക ഭക്ഷ്യസുരക്ഷാവാരാഘോഷം സംഘടിപ്പിച്ചു. ജനങ്ങൾക്കിടയിൽ വർധിക്കുന്ന അമിത വണ്ണവും അതുവഴിയുണ്ടാകുന്ന സാംക്രമികേതര രോഗങ്ങളുടെ വർധനവും നിയന്ത്രിക്കേണ്ടതിന്റെ ആവശ്യകത മുൻനിർത്തിയാണ് ഈ വർഷത്തെ ലോക ഭക്ഷ്യസുരക്ഷാദിന പരിപാടികൾ സംഘടിപ്പിച്ചത്.ജൂൺ 9ന് കാഞ്ഞിരപ്പള്ളി അമൽജ്യോതി കോളജ് ഓഫ് എൻജിനീയറിങ്ങിൽ പരിപാടിക്ക് തുടക്കം കുറിച്ചു. ഭക്ഷ്യസുരക്ഷാ മുൻ ഡെപ്യൂട്ടി കമ്മീഷണർ വി. എസ്. പ്രദീപ്കുമാർ മുഖ്യപ്രഭാഷണം നടത്തി. ഭക്ഷ്യസുരക്ഷാ അസിസ്റ്റന്റ് കമ്മിഷണർ എ.എ. ജനസ്, അമൽജ്യോതി കോളജ് ഡയറക്ടർ റവ. ഡോ. റോയ് പഴയ റമ്പിൽ, കോളജ് പ്രിൻസിപ്പൽ ഡോ. ലില്ലിക്കൂട്ടി ജേക്കബ്, ഡോ സണ്ണിച്ചൻ വി. ജോർജ്, ഡോ ജെ.ആർ. അനൂപ് രാജ് എന്നിവർ പങ്കെടുത്തു.തുടർന്ന് വിദ്യാർഥികൾക്കായി ക്വിസ് മത്സരവും സ്കിറ്റ് മത്സരവും നടത്തി. ക്വിസ് മത്സരത്തിൽ സെന്റ് ജോർജ് കോളേജ് അരുവിത്തുറ ഒന്നാം സ്ഥാനവും എം.ജി. യൂണിവേഴ്സിറ്റി രണ്ടാം സ്ഥാനവും സെന്റ് തോമസ് പാല മൂന്നാം സ്ഥാനവും കരസ്ഥമാക്കി സ്കിറ്റ് മത്സരത്തിൽ പാലാ സെന്റ് തോമസ് കോളജ് ഒന്നാം സ്ഥാനവും പാലാ അൽഫോൻസാ കോളേജ് രണ്ടാം സ്ഥാനവും കാഞ്ഞിരപ്പള്ളി അമൽജ്യോതി കോളേജ് മൂന്നാം സ്ഥാനവും കരസ്ഥമാക്കി.അമിതവണ്ണം തടയുക എന്ന ആശയത്തെ ആസ്പദമാക്കി കാരിത്താസ് നഴ്സിംഗ് കോളജുമായി സഹകരിച്ച് നടത്തിയ വാക്കത്തൺ ജില്ലാ പോലീസ് മേധാവി ഷാഹുൽ ഹമീദ് ഫ്ളാഗ് ഓഫ് ചെയ്തു.തുടർന്ന് കോട്ടയം ജില്ലയിലെ കാറ്ററിങ് മേഖലയിൽ പ്രവർത്തിക്കുന്ന വിവിധ യൂണിറ്റുകൾക്കായി ബോധവൽക്കരണ ക്ലാസ് സംഘടിപ്പിച്ചു. പാലാ സർക്കിൾ ഭക്ഷ്യ സുരക്ഷാ ഓഫീസർ ജി.എസ്. സന്തോഷ് കുമാർ ക്ലാസ് നയിച്ചു. പി. എം. ജവഹർ നവോദയ വിദ്യാലയത്തിലെ വിദ്യാർഥികൾക്കായി ബോധവൽക്കരണ ക്ലാസും സംഘടിപ്പിച്ചു. കോട്ടയം ഗവൺമെന്റ് മെഡിക്കൽ കോളേജ് കമ്മ്യൂണിറ്റി മെഡിസിൻ വിഭാഗം അസിസ്റ്റന്റ് പൊഫസർ ഡോ. വി. എസ് സിജി. ക്ലാസ് നയിച്ചു. ഭക്ഷ്യസുരക്ഷാ അസിസ്റ്റന്റ് കമ്മിഷണർ എ.എ. അനസിന്റെ നേതൃത്തത്തിൽ ഡോ. ജെ. ബി. ദിവ്യ, ഡോ. സ്നേഹ എസ്.നായർ, ജി. എസ്. സന്തോഷ്കുമാർ, നിമ്മി അഗസ്റ്റിൻ, നവീൻ ജെയിംസ്, നീതു രവികുമാർ, ഡോ. തെരസിലിൻ ലൂയിസ്, ഷെറിൻ സാറാ ജോർജ്, ഡോ. അക്ഷയ വിജയൻ എന്നിവർ പരിപാടികൾക്ക് നേതൃത്വം നൽകി.
കോട്ടയം : ആമ്പൽ വസന്തത്തിലേക്കു കോട്ടയം,മലരിക്കൽ ചുവടുവച്ചു കഴിഞ്ഞു. കൊയ്ത്ത് കഴിഞ്ഞ് വെള്ളം കയറ്റിയതോടെ മലരിക്കലിൽ ആമ്പൽ വിരിഞ്ഞു തുടങ്ങി. 1800 ഏക്കറുള്ള ജെ ബ്ലോക്ക് ഒൻപതിനായിരം പാടശേഖരത്തിന്റെ മലരിക്കൽ ഭാഗത്തും. 820 ഏക്കറുള്ള തിരുവായിക്കരി പാടത്തുമാണ് ആമ്പൽ വിരിയുന്നത്. ഇപ്പോൾ തിരുവായ്ക്കരി ഭാഗത്താണു കൂടുതൽ ആമ്പൽക്കാഴ്ചയുള്ളത്. വള്ളത്തിൽ അരമണിക്കൂർ പോയാലാണ് ഇപ്പോൾ കൂടുതൽ ആമ്പൽ കാണാൻ സാധിക്കുന്നത്. മഴക്കാലത്തിനു ശേഷം ജൂലൈ – ഓഗസ്റ്റോടെയാണ് മലരിക്കലിൽ ആമ്പൽ സീസൺ ആരംഭിക്കുന്നത്. ഒക്ടോബറിൽ കൃഷി സീസൺ ആരംഭിക്കുന്നതോടെ പാടത്തെ വെള്ളം വറ്റിച്ച് നെല്ല് വിതയ്ക്കും. കുമരകം, കോട്ടയം ഭാഗത്തുനിന്നുള്ളവർ ഇല്ലിക്കൽ കവലയിൽ എത്തി തിരുവാർപ്പ് റോഡിൽ പ്രവേശിച്ച് കാഞ്ഞിരം ജംക്ഷനിൽ എത്തി അവിടെനിന്ന് ഇടത്തോട്ടുതിരിഞ്ഞ് കാഞ്ഞിരം റോഡിലൂടെ മലരിക്കൽ എത്താം. അവിടെനിന്നു മുന്നോട്ടുപോയാൽ തിരുവായ്ക്കരി പാടത്തും എത്താം.യാത്രക്ക് മുൻപ് മഴക്കാല മുൻകരുതലുകൾ എടുക്കുവാൻ ശ്രദ്ധിക്കുക
കോട്ടയം, ഈ അധ്യയന വർഷം മുതൽ സ്കൂൾ സമയക്രമം പുതുക്കി നിശയിച്ച സർക്കാർ നടപടി പുന: പരിശോധിക്കണമെന്ന് സമസ്ത കേരള ജംഇയ്യത്തുൽ ഉലമ കോട്ടയം ജില്ലാ കമ്മിറ്റി ആവശ്യപ്പെട്ടു.പ്രാബല്യത്തിൽ വന്ന സമയ മാറ്റം ലക്ഷക്കണക്കിന് മദ്രസാ വിദ്യാർത്ഥികളുടെ ധാർമിക പഠനത്തെ ബാധിക്കും. പതിറ്റാണ്ടുകളായി കേരളത്തിൽ ഉൾപ്പെടെ കാര്യക്ഷമമായി രാവിലെയും വൈകുന്നേരവും മദ്രസ പഠനം നടക്കുന്നുണ്ട്. രാവിലെ മദ്രസ ക്ലാസുകൾക്ക് ശേഷമാണ് സ്കൂളുകളിലേക്ക് കുട്ടികൾ എത്തുന്നത്. പുതിയ സമയക്രമം അവരുടെ മതപഠനത്തെ ബാധിക്കുകയും, ആവശ്യമായ സമയം ലഭിക്കാത്തതുമൂലം സിലബസ് അനുസരിച്ച് മദ്രസാ ക്ലാസുകൾ തീർക്കാൻ കഴിയാതെയും വരും ഇത് മദ്രസ സംവിധാനത്തെ തന്നെ പ്രതികൂലമായി ബാധിക്കുന്ന പ്രശ്നമായി മാറും അതിനാൽ സർക്കാർ തീരുമാനം പുന പരിശോധിച്ചു പുതുക്കിയ സമയക്രമം മാറ്റി നിശ്ചയിക്കണമെന്നും യോഗം ആവശ്യപ്പെട്ടു കെഎസ് എം റഫീഖ് അഹമ്മദ് സഖാഫി അധ്യക്ഷത വഹിച്ചു. സമസ്ത ജില്ലാ പ്രസിഡണ്ട് അബ്ദുൽ അസീസ് സഖാഫി ഉൽഘാടനം നിർവഹിച്ചു. പി എം അനസ് മദനി, അബ്ദുല്ലത്തീഫ് മുസ്ലിയാർ അൻവർ മദനി, അഖൂബ് നഈമി, സലീം മിസ്ബാഹി, ഇയാസ് സഖാഫി,സംസാരിച്ചു
വെള്ളികുളം: വെള്ളികുളം സെൻ്റ് ആൻ്റണീസ് സ്കൂളിൽ എസ്.എസ്.എൽ.സി പരീക്ഷയിൽ 100% വിജയം നേടിയതിനോടനുബന്ധിച്ച് വിജയദിനാഘോഷം സ്കൂൾ ഓഡിറ്റോറിയത്തിൽ വച്ച് നടത്തപ്പെട്ടു.സ്കൂൾ മാനേജർ ഫാ.സ്കറിയ വേകത്താനം അധ്യക്ഷത വഹിച്ച യോഗത്തിൽ അരുവിത്തുറ സെൻ്റ് ജോർജ് കോളേജ് ബർസാർ ഫാ. ബിജു കുന്നക്കാട്ട് വിജയ ദിനാഘോഷം ഉദ്ഘാടനം ചെയ്തു.കഠിനാധ്വാനത്തിലൂടെയാണ് ജീവിതവിജയം നേടുന്നത്. കഠിനാധ്വാനത്തിന് പകരമൊന്നില്ല. മനസ്സിൻ്റെ ഉറച്ച തീരുമാനമാണ് ജീവിത വിജയത്തിന് നിദാനം എന്ന് ഫാ. ബിജു വിദ്യാർത്ഥികളെ ഉദ്ബോധിപ്പിച്ചു. സാഹചര്യങ്ങളെക്കാൾ ഉപരിയായി ഓരോ വിദ്യാർത്ഥിയും തങ്ങളുടെ കഴിവിനെ എങ്ങനെ അധ്വാനമാക്കി മാറ്റാം എന്ന നിശ്ചയദാർഢ്യമാണ് വേണ്ടതെന്ന് ഫാ. ബിജു ഓർമ്മപ്പെടുത്തി.മുൻ ഹെഡ്മാസ്റ്റർ ജോ സെബാസ്റ്റ്യൻ പുത്തൻപുര , വാർഡ് മെമ്പർ ബിനോയി ജോസഫ് പാലക്കൽ, പി. ടി. എ. പ്രസിഡൻ്റ് ആൻ്റണി കെ. ജെ. കൊല്ലി തടത്തിൽ തുടങ്ങിയവർ അനുമോദന പ്രസംഗം നടത്തി.എസ്.എസ്.എൽ.സി. പരീക്ഷയിൽ ഫുൾ എ പ്ലസ് നേടിയ ആഗ്നസ് മരിയ അനീഷ് കൊല്ലി കൊളവിൽ, അനാമിക വിൻസൻറ് ,അനന്യ പ്രശോഭ , അനന്യ റ്റി.എസ്. എന്നിവരെയും ഒമ്പത് എ പ്ലസ് ലഭിച്ച സേറാ ആൻ ജോസഫ് താന്നിക്കൽ, ജിജോ ജോൺ, എട്ട് എ പ്ലസ് ലഭിച്ച അനാമിക,എൻ. എം എം എസ് . സ്കോളർഷിപ്പ് നേടിയ ആൻ്റോ ജോയി തുണ്ടത്തിൽ യു.എസ്.എസ്. സ്കോളർഷിപ്പ് ലഭിച്ച അനഘ എസ്. രാജ്, എൽ. എസ്.എസ്.സ്കോളർഷിപ്പ് ലഭിച്ച സെറീനാമോൾ എബി , ലിയോണ റോബിൻസൺ തുടങ്ങിയവർക്ക് ഉപഹാരം നൽകി ആദരിച്ചു. എം.ജി.യൂണിവേഴ്സിറ്റി ബി. എ . ഇക്കണോമിക്സ് പരീക്ഷയിൽ മൂന്നാം റാങ്ക് കരസ്ഥമാക്കിയ സ്കൂളിലെ പൂർവ്വ വിദ്യാർഥിയായ എയ്ഞ്ചൽ സി. എസ് . ചൂണ്ടയാനിപ്പുറത്തിന് ചടങ്ങിൽ ഉപഹാരം നൽകി അനുമോദിച്ചു. എസ്.എസ്.എൽ.സി. പരീക്ഷയിൽ വിജയിച്ച എല്ലാ വിദ്യാർത്ഥികൾക്കും മെഡൽ വിതരണം ചെയ്തു. തുടർന്ന് വിദ്യാർത്ഥികൾ വിവിധ കലാപരിപാടികൾ അവതരിപ്പിച്ചു.ഹെഡ്മാസ്റ്റർ സോജൻ ജോർജ് ഇളംതുരുത്തിയിൽ,മാർട്ടിൻ പി. ജോസഫ് പ്ലാത്തോട്ടം, സിനിമോൾ ജിജി വളയത്തിൽ,ജോമി ആൻ്റണി കടപ്ലാക്കൽ,എൽസി സെബാസ്റ്റ്യൻ കല്ലാറ്റുപറമ്പിൽ, ഹണി സോജി കുളങ്ങര, സിസ്റ്റർ ജിൻസി മരിയ തകിടിയേൽ,മഞ്ജു താന്നിക്കൽ തുടങ്ങിയവർ പരിപാടികൾക്ക് നേതൃത്വം നൽകി.
തിരുവനന്തപുരം: സംസ്ഥാനത്തെ സ്കൂൾ ഉച്ച ഭക്ഷണ മെനു വിപുലപ്പെടുത്താൻ വിദ്യാഭ്യാസ വകുപ്പ്. സംസ്ഥാനത്തെ സ്കൂൾ ഉച്ചഭക്ഷണ മെനു ശാസ്ത്രീയമായി പരിശോധിക്കുന്നതിനും പരിഷ്കരിക്കുന്നതിനും നിയോഗിച്ച വിദഗ്ധ സമിതി തയ്യാറാക്കിയ റിപ്പോർട്ട് പ്രകാരം, മെനു പരിഷ്കരണത്തിന്റെ ഭാഗമായി മെനു പ്ലാനിംഗ് നടത്തുമ്പോൾ ഒരു ദിവസത്തെ കറികളിൽ ഉപയോഗിക്കുന്ന പച്ചക്കറിയ്ക്ക് ബദലായി അനുചിതമായ മറ്റ് പച്ചക്കറികൾ നൽകേണ്ടതാണെന്ന് വിദ്യാഭ്യാസ മന്ത്രി വി. ശിവൻകുട്ടി പറഞ്ഞു. ഇലക്കറി വർഗ്ഗങ്ങൾ കറികളായി ഉപയോഗിക്കുമ്പോൾ അവയിൽ പയർ അല്ലെങ്കിൽ പരിപ്പ് വർഗ്ഗമോ ചേർക്കണം. ആഴ്ചയിൽ ഒരു ദിവസം ഫോർട്ടിഫൈഡ് അരി വച്ച് വിവിധയിനം ചോറിന്റെ (വെജിറ്റബിൾ ഫ്രൈഡ്റൈസ്, ലെമൺ റൈസ്, വെജ് ബിരിയാണി) വിഭവങ്ങൾ തയ്യാറാക്കാൻ നിർദ്ദേശം നൽകിയിട്ടുണ്ടെന്നും മന്ത്രി. ഇവയോടൊപ്പം എന്തെങ്കിലും വെജിറ്റബിൾ കറികൾ (കൂട്ടുകറി, കുറുമ) നൽകുമെന്നും മന്ത്രി കൂട്ടിച്ചേർത്തു. വിദഗ്ധ സമിതിയുടെ അഭിപ്രായത്തിൽ പച്ചക്കറിക്ക് ബദലായി മാസത്തിൽ ഒന്നോ രണ്ടോ ദിവസങ്ങളിൽ മൈക്രോ ഗ്രീൻസ് മെനുവിൽ ഉൾപ്പെടുത്താവുന്നതാണ്. പുതിന, ഇഞ്ചി, നെല്ലിക്ക, പച്ചമാങ്ങ എന്നിവ ചേർത്ത് തയ്യാറാക്കുന്ന ചമ്മന്തി കൊടുക്കുന്ന കാര്യം പരിഗണിച്ചിട്ടുണ്ട്. വ്യത്യസ്തതയ്ക്കായി ഇവ വെജ് റൈസ്, ബിരിയാണി, ലെമൺ റൈസ് എന്നിവയുടെ കൂടെ തൊടുകറിയായി വിളമ്പാവുന്നതാണെന്നും മന്ത്രി സ്കൂളുകൾക്ക് നിർദേശം നൽകി. ചെറുധാന്യങ്ങളുടെ പ്രാധാന്യം ഉൾക്കൊണ്ടുകൊണ്ട് കുട്ടികൾക്ക് ആഴ്ചയിൽ റാഗി ഉപയോഗിച്ചു റാഗി ബാൾസ്, മിതമായ അളവിൽ ശർക്കരയും തേങ്ങയും ചേർത്ത റാഗി കൊഴുക്കട്ട, ഇലയട, അവിൽ കുതിർത്തത് (വിളയിച്ചത്), പാൽ ഉപയോഗിച്ച് ക്യാരറ്റ് പായസം, റാഗിയോ മറ്റ് മില്ലറ്റുകളോ ഉപയോഗിച്ചുള്ള പായസം എന്നീ വ്യത്യസ്ത വിഭവങ്ങൾ മെനുവിൽ ഉൾപ്പെടുത്തിയിട്ടുണ്ടെന്നും മന്ത്രി അറിയിച്ചു. സ്കൂളിൽ നൽകേണ്ട ദിവസ ഇനങ്ങൾ സംബന്ധിച്ചുണ്ടാക്കിയ ലിസ്റ്റ്: ▪️ഒന്നാം ദിവസം : ചോറ്, കാബേജ് തോരൻ, സാമ്പാർ ▪️രണ്ടാം ദിവസം : ചോറ്, പരിപ്പ് കറി, ചീരത്തോരൻ ▪️മൂന്നാം ദിവസം : ചോറ്, കടല മസാല, കോവയ്ക്ക തോരൻ ▪️നാലാം ദിവസം : ചോറ്, ഓലൻ, ഏത്തയ്ക്ക തോരൻ ▪️അഞ്ചാം ദിവസം : ചോറ്, സോയ കറി, കാരറ്റ് തോരൻ ▪️ആറാം ദിവസം : ചോറ്, വെജിറ്റബിൾ കുറുമ, ബീറ്റ്റൂട്ട് തോരൻ ▪️ഏഴാം ദിവസം : ചോറ്, തീയൽ, ചെറുപയർ തോരൻ ▪️എട്ടാം ദിവസം : ചോറ്, എരിശ്ശേരി, മുതിര തോരൻ ▪️ഒമ്പതാം ദിവസം : ചോറ്, പരിപ്പ് കറി, മുരിങ്ങയില തോരൻ ▪️പത്താം ദിവസം : ചോറ്, സാമ്പാർ, മുട്ട അവിയൽ ▪️പതിനൊന്നാം ദിവസം : ചോറ്, പൈനാപ്പിൾ പുളിശ്ശേരി, കൂട്ടുക്കൂറി ▪️പന്ത്രണ്ടാം ദിവസം : ചോറ്, പനീർ കറി, ബീൻസ് തോരൻ മലബാർ ലൈവ് ന്യൂസ്. ▪️പതിമൂന്നാം ദിവസം : ചോറ്, ചക്കക്കുരു പുഴുക്ക്, അമരയ്ക്ക തോരൻ ▪️പതിനാലാം ദിവസം : ചോറ്, വെള്ളരിക്ക പച്ചടി, വൻപയർ തോരൻ ▪️പതിനഞ്ചാം ദിവസം : ചോറ്, വെണ്ടയ്ക്ക മപ്പാസ്, കടല മസാല ▪️പതിനാറം ദിവസം : ചോറ്, തേങ്ങാചമ്മന്തി, വെജിറ്റബിൾ കുറുമ ▪️പതിനേഴാം ദിവസം : ചോറ് /എഗ്ഗ് ഫ്രൈഡ് റൈസ്, വെജിറ്റബിൾ മോളി ▪️പതിനെട്ടാം ദിവസം : ചോറ് / കാരറ്റ് റൈസ്, കുരുമുളക് മുട്ട റോസ്റ്റ് ▪️പത്തൊമ്പതാം ദിവസം : ചോറ്, പരിപ്പ് കുറുമ, അവിയൽ ▪️ഇരുപതാം ദിവസം : ചോറ് / ലെമൺ റൈസ്, കടല മസാല
തിടനാട്: തിടനാട് ഗ്രാമപഞ്ചായത്തിലെ കൊണ്ടൂർ ശ്രീകൃഷ്ണസ്വാമി ക്ഷേത്രത്തിലെ ജീർണാവസ്ഥയിലായിരുന്ന ക്ഷേത്രക്കുളം നവീകരിച്ച് പുനർ നിർമ്മിക്കുന്നതിന് അഡ്വ. സെബാസ്റ്റ്യൻ കുളത്തുങ്കൽ എം.എൽ.എ മുൻകൈയെടുത്ത് സംസ്ഥാന ഇറിഗേഷൻ വകുപ്പിൽ നിന്നും 65 ലക്ഷം രൂപ അനുവദിപ്പിച്ചത് വിനിയോഗിച്ച് ക്ഷേത്രക്കുള നവീകരണ പ്രവർത്തികളുടെ ഉദ്ഘാടനം അഡ്വ. സെബാസ്റ്റ്യൻ കുളത്തുങ്കൽ എം.എൽ.എ നിർവഹിച്ചു. ക്ഷേത്ര കോമ്പൗണ്ടിൽ ഏകദേശം 22 സെൻറ് സ്ഥലത്ത് 36 മീറ്റർ നീളത്തിലും 24 മീറ്റർ വീതിയിലുമാണ് കുളം പുനർ നിർമ്മിക്കുക. ഇത് കൂടാതെ ക്ഷേത്രക്കുളത്തിന്റെ വടക്ക്, കിഴക്ക് ഭാഗങ്ങളിൽ 20 മീറ്റർ നീളത്തിലും, 5 മീറ്റർ ഉയരത്തിലും കൽപ്പടവുകൾ നിർമ്മിക്കും. കൂടാതെ പടവുകളും നിർമ്മിക്കും. ക്ഷേത്ര ആചാരപ്രകാരമുള്ള കർമ്മങ്ങൾക്ക് ആവശ്യമായ അനുബന്ധ നിർമ്മാണങ്ങളും നടത്തും. കുളത്തിൽ അധികമായി വരുന്ന ജലം ഒഴുകി പോകുന്നതിനുള്ള ലീഡിങ് ചാനലും നിർമ്മിക്കും. ഉദ്ഘാടന സമ്മേളനത്തിൽ ക്ഷേത്ര സമിതി പ്രസിഡൻറ് പി.ഡി സുനിൽ ബാബു അധ്യക്ഷത വഹിച്ചു, ഗ്രാമപഞ്ചായത്ത് പ്രസിഡൻറ് സ്കറിയ ജോസഫ് പൊട്ടനാനി, ബ്ലോക്ക് പഞ്ചായത്ത് അംഗം ജോർജ് ജോസഫ് വെള്ളൂക്കുന്നേൽ, വാർഡ് മെമ്പർ ഓമന രമേശ്, മൈനർ ഇറിഗേഷൻ എക്സിക്യൂട്ടീവ് എഞ്ചിനീയർ സുമേഷ്കുമാർ പി, അസിസ്റ്റൻറ് എക്സിക്യൂട്ടീവ് എഞ്ചിനീയർ മനോജ് കെ.സി, എൻ.എസ്.എസ് താലൂക്ക് യൂണിയൻ പ്രസിഡൻറ് മനോജ് ബി നായർ, ക്ഷേത്ര കമ്മിറ്റി ഭാരവാഹികളായ ശംഭുദേവ ശർമ്മ വെള്ളൂർ ഇല്ലം, സന്തോഷ് കുമാർ തട്ടാറാകത്ത്, അരുൺ കൃഷ്ണൻകുട്ടി തുടങ്ങിയവർ പ്രസംഗിച്ചു. നിർമ്മാണ പ്രവർത്തനങ്ങൾ ആറുമാസത്തിനുള്ളിൽ പൂർത്തീകരിക്കുമെന്ന് എം.എൽ.എ അറിയിച്ചു.
അരുവിത്തുറ :അരുവിത്തുറ സെൻറ് ജോർജ് കോളജിലെ ബിരുദദാന ചടങ്ങ് ഈ മാസം 19ന് മുൻ ഐഎഎസ് ഉദ്യോഗസ്ഥൻ ഡോ രാജു നാരായണ സ്വാമി ഉദ്ഘാടനം ചെയ്യും.400 ഓളം വിദ്യാർത്ഥികളാണ് ബിരുദം പൂർത്തിയാക്കി സർട്ടിഫിക്കറ്റുകൾ ഏറ്റുവാങ്ങുന്നത്.കോളേജ് മാനേജർ വെരി റവ. ഫാ സെബാസ്റ്റ്യൻ വെട്ടുകല്ലേൽ അധ്യക്ഷത വഹിക്കുന്ന ചടങ്ങിൽ പാലാ രൂപതാ പ്രോട്ടോസിഞ്ചല്യൂസ്സ് മോൺ. റവ ഡോ ജോസഫ് തടത്തിൽ അനുഗ്രഹ പ്രഭാഷണം നടത്തും.കോളേജ് ബർസാർ റവ ഫാ.ബിജു കുന്നയ്ക്കാട്ട് വൈസ് പ്രിൻസിപ്പാൾ ഡോ ജിലു ആനി ജോൺ, ഐ ക്യു ഏ സി കോഡിനേറ്റർ ഡോ.സുമേഷ് ജോർജ് തുടങ്ങിയവർ ചടങ്ങിൽ സംസാരിക്കും.നാക്ക് റീ അക്ര ഡിറ്റേഷനിൽ എ പ്ലസ് പ്ലസ് ആക്രഡിറ്റേഷൻ ലഭിച്ച അരുവിത്തുറ സെൻറ് ജോർജ് കോളേജ് ജില്ലയിൽ കൂടുതൽ ബിരുദധാരികളെ സമൂഹത്തിന് സമ്മാനിക്കുന്ന വിദ്യാഭ്യാസ സ്ഥാപനമാണ്. ചടങ്ങിൽ പി ജി വിദ്യാർത്ഥികൾക്കുള്ള ബിരുദ സർട്ടിഫിക്കറ്റുകളും വിതരണം ചെയ്യും. ഈ വർഷം യൂണിവേഴ്സിറ്റി റാങ്കുകൾ കരസ്ഥമാക്കിയ വിദ്യാർത്ഥികളേയും. വിവിധ കമ്പിനികളിൽ ക്യാംപസ് പ്ലെയ്സ്മെൻ്റ് വഴി ജോലി കരസ്ഥമാക്കിയ വിദ്യാർത്ഥികളേയും ചടങ്ങിൽ ആദരിക്കും.
